CARMEN VII
Quaeris, quot mihi basationes
tuae, Lesbia, sint satis superque.
Quam magnus numerus Lybissae harenae
lasarpiciferis iacet Cyrenis
oraclum Iovis inter aestuosi
et Batti veteris sacrum sepulcrum;
aut quam sidera multa, cum tacet nox,
furtivos hominum vident amores:
tam te basia multa basiare
vesano satis et super Catullo est,
|
5
10
|
quae nec pernumerare curiosi
possint nec mala fascinare lingua.
|
|
|
